Kreu i Inspektoriatit Shtetëror të Mbikëqyrjes së Tregut, Lavdrim Sahitaj ka deklaruar se prindërit duhet të tregohen të kujdesshëm kur blejnë lodra për fëmijët, për shkak se ato janë të pacertifikuara dhe përmbajnë kimikate të rrezikshme. Sipas tij, në treg janë bllokuar gati 3500 lodra që nuk i përmbushin standardet. Sahitaj shprehet se një pjesë e madhe e lodrave, përbëhen nga kimikate të rrezikshme siç janë dhe ftalatet.
“Janë bllokuar afërsisht 3500 lodra vetëm muajin e fundit të cilat janë një sasi jo e vogël. Një vit më parë kemi bllokuar 20.000 të tilla.
Për hir të së vërtetës, kemi sjelljen e tregut në standard dhe çdo ditë është përmirësuarr për faktin se importuesit e shumicës janë ndërgjegjësuar që produktet mund të bllokohen dhe shkatërrohen, siç edhe ndodhi. Kryesisht janë të rrezikshme lodrat të cilat kanë elementë kimikë, ftalate, zink, elemente të cilat janë lehtësisht të thyeshme, të gëlltitshme”- tha Sahitaj.
