Që prej 26 nëntorit shumë familje në fshatin Bubq po jetojnë në çadra ndërsa kaluan edhe festën e ndërrimit të viteve nën temperaturat e acarta. Për Ora News ata shprehen se jetesa në çadër është e vështirë sidomos për fëmijët të cilët nuk kanë mundur ti përballojnë temperaturat e ulta duke shfaqur problemet e para shëndetësore.
Familja e Shpëtim Ajazit me 5 anëtarë jeton në një çadër pasi tërmeti i 26 nëntorit u dëmtoi rëndë shtëpinë. Moti i ftohtë me temperatura të ulta ua ka vështirësuar jetesën në çadër. “Këtu në çadër është shumë e vështirë. Çuni i vogël është i sëmurë, edhe bashkëshorti vuan nga diabeti”
Gjyshja e shtëpisë shprehet se nuk kanë marrë as bonusin e qerasë ndërsa apelon që shteti t’u mundësojë sa më shpejt ndërtimin e shtëpive.“Dua shtëpi të hyj brenda. Kështu paska qenë kismet për plakën të vdesë në çadër” Në të njëjtin fshat, në çadër jeton edhe një tjetër familje. Asnjë prej anëtarëve të saj nuk ndodhej aty pasi kishin shkuar tek të afërmit për tu ngrohur në këtë ditë të ftohtë. Në fshatin Bubq të Fushë – Krujës shumë banorë pasi kaluan natën e ndërrimit të viteve në çadra po jetojnë në të njëjtat kushte edhe në ditët e para të janarit. Ata kërkojnë një zgjidhje pasi nuk i përballojnë temperaturat e dimrit të ftohtë në çadër.
