Kampionati gjerman i planifikuar për të rifilluar në 9 maj, është shtyrë për shkak se Kancelarja Angela Merkel nuk ka marrë akoma një vendim mbi rifillimin e saj. 16 ose 23 maj konsiderohen tani si datat më reale për të rifilluar Bundesliga. Bundesliga e Gjermanisë do të duhet të presë një javë tjetër për të mësuar në lidhje me një datë të mundshme të rifillimit, pasi qeveria nuk ka marrë akoma një vendim mbi rifillimin. Kancelarja Angela Merkel tha se çdo vendim për fillimin e aktivitetet sportive do të merret të Mërkurën, 6 maj.
“Absolutisht është e nevojshme që ne të mbetemi të disiplinuar dhe t’i përmbahemi udhëzimeve shëndetësore,” u shpreh Merkel.
Liga Gjermane e Futbollit (DFL), ka paralajmëruar se shumë ekipe të kategorisë së pare do të jenë në një pozicion financiar “kërcënues për ekzistencën” nëse kampionati nuk rifillon deri në qershor. Me nëntë ndeshje të sezonit të mbetura, Bayern Munich kryeson tabelën, katër pikë përpara Borussia Dortmund, por DFL ka nevojë që sezoni të përfundojë deri më 30 qershor për shkak të marrëveshjeve me sponsorët dhe transmetuesit.
Lojtarët tashmë janë rikthyer në stërvitje dhe javën e kaluar DFL tha që liga do të ishte e gatshme të kthehej më 9 maj – por 16 ose 23 maj konsiderohen tani data më realiste. Gjermania ka ndaluar ngjarjet e mëdha me turma deri në 24 tetor, kështu që ndeshjet do të jenë pas dyerve të mbyllura.
