Ministria e Financave kishte planifikuar të investonte rreth 2 milionë euro për përmirësimin e konvikteve në godinat e Qytetit Studenti në buxhetin e vitit 2018. Deri në fund të tetorit, këto fonde janë realizuar thuajse në nivelin zero.
Të dhënat zyrtare të Ministrisë së Financave tregojnë se këtë vit do të shpenzoheshin 250 milionë euro në konvikte. Prej kësaj shume, 108 milionë do të shpenzoheshin për rehabilitimin e godinave në Qytetin Studenti dhe 100 milionë lekë për eficencën e energjisë në këto godina.
Realizimi i investimeve në këto projekte ka qenë zero, shkruan Monitor.
Realizimi i fondeve buxhetore për investime në arsimin e lartë gjithashtu ka qenë shumë i ulët edhe për vitin 2017.
Të dhënat zyrtare të Ministrisë së Arsimit tregojnë se investime kapitale në “Programin, Arsimi i Lartë” ishin miratuar 330 milion lekë, nga të cilat me financim të brendshëm ishin 230 milion lekë, si dhe me financim të huaj rreth 100 milion lekë.
Buxheti i rishikuar për vitin 2017 uli financimet për investime në arsimin e lartë duke i çuar në 168 milion lekë, nga të cilat me financim të brendshëm ishin 82.8 milion lekë, si dhe financim të huaj në shumën 108 milion lekë.
Por edhe pse fondet u shkurtuan ato nuk arritën të realizoheshin. Realizimi i shpenzimeve kapitale për 12- mujorin 2017 në këtë program është 72 milion lekë ose 57 %.
Ministria e Arsimit ka arsyetuar se, financimi i huaj për 12-mujorin e parë 2017 nuk është realizuar, për shkak të rishikimit të marrëveshjes si dhe ndryshimit të selisë së agjencisë zbatuese RASH.
