Çdo qytetar evropian prodhon mesatarisht në vit 200 kg mbetje të rrezikshme. Sipas Agjencisë Evropiane të Ambientit, këto mbetje përmbajnë elementë të dëmshëm për shëndetin e njerëzve, por edhe për ambientin. Bëhet fjalë kryesisht për elementë që ndodhen tek kozmetika, bateritë, bojërat, pesticidet, llambat dhe të gjitha mbetjet elektrike dhe elektronike kryesisht të elektroshtëpiakeve që përdorim në shtëpitë tona.
Për të gjithë këto argumente dhe për të hartuar politikat e duhura për të gjetur një zgjidhje për këtë problem kaq bashkëkohor, po mbahen punimet e Javës Evropiane për Reduktimin e Mbetjeve nga 17-25 Nëntor. Kongresi që ka mbërritur në Edicionin e 10 tashmë, këtë vit ka si temë diskutimesh pikërisht mbetjet e rrezikshme që mbërrijnë kryesisht nga produktet e përdorimit shtëpiak dhe vetjak.
