Kryeministri Edi Rama ka komentuar nga Vlora çështjen e kufirit detar me Greqinë, teksa kjo e fundit ka deklaruar se do të kërkojë zgjerimin me 12 milje në ujërat shqiptare. Mes të tjerash, kreu i qeverisë është shprehur se nuk mund të ketë marrëveshje me Greqinë për detin pa miratimin e Presidentit Ilir Meta. Sipas Ramës, është Presidenti ai që firmos marrëveshjen dhe e dërgon atë në Gjykatën Kushtetuese.
“Nuk mund të ketë marrëveshje pa miratimin e Presidentit. E përsëris për ata që duan të dëgjojnë, jo për ata që bëjnë politikë me kap ca të kapësh, që nuk ka asnjë marrëveshje Negociatat u ndërprenë pa një përfundim që kur në Greqi u ndryshua qeveria. Me qeverinë e re nuk kemi asnjë nisje negociatash.
Deklarata e kryeministrit grek për shtrirje me 12 milje nuk ka të bëjë me Shqipërinë Një shtrirje e tillë nuk është e mundur me Shqipërinë. Kjo deklaratë është kthyer në mundësi të atyre që peshkojnë ç’të munden, është kthyer në qesharake. Si të bëhet një marrëveshje kur nuk ka firma, vula, ajo shkon nga qeveria te presidenti, ai ka thënë do e çoj në Kushtetuese”, është shprehur Rama.
