George Orwell ka lindur më 25 qershor të vitit 1903 në Indi. Ai ka ndërruar jetë në Londër si pasojë e një sëmundje të rëndë, tuberkulozit. Novelisti i famshëm ndërroi jetë më datën 21 janar të vitit 1950. Në 70-vjetorin e vdekjes, “tiranatoday.al” ka vendosur që të sjellë për lexuesit disa informacione bazike rreth tij. Orwell njihet për veprat mbi padrejtësitë shoqërore, për kritikat letrare dhe si gazetar polemik. Gjithnjë ka pikasur për kundërshtimet e forta ndaj totalitarizmit si dhe për shkrimet në mbështetje të socializmit demokratik.
Dy nga veprat e tij më madhështore janë “1984” dhe “Ferma e Kafshëve”, të cilat BBC-ja i ka cilësuar si novelat më të njohura në botë, të shekullit 20. Kujtojmë se “Ferma e Kafshëve” është botuar në vitin 1945 dhe vepra tjetër, “1984” është botuar katër vite më vonë. Në veprën e famshme, “Ferma e kafshëve”, George Orwell ofron një satirë mbi revolucionin komunist dhe shtetin sovjetik.
Kjo vepër u ndalua të publikohej në Britaninë e Madhe, e cila në atë kohë ishte aleate me Stalinin kundër Hitlerit.Veprat e tij nuk janë thjesht mbi diktaturën siç e njohim ne sot, por mbi shpirtin e çuditshëm njerëzor, që fillon të kuptojë se çfarë është diktatura vetëm pasi kjo e fundit ka “vdekur”. Mirëpo ai gjithashtu do mbahet mend gjatë edhe për shumë vepra të tjera.
Për të gjithë ata që ende nuk e kanë lexuar, romani “1984” flet për një botë që gjendet e ndarë në një konflikt të vazhdueshëm. Konflikti justifikon sundimin e qeverisë, e cila ka zhvilluar shkencën me qëllimin për të kontrolluar dhe shtypur individin. Bota e Orwell është ajo ku jeta private e individit nuk ekziston.
