Mëngjesin e sotëm është bllokuar tuneli në autostradën Tiranë-Elbasan. Burime për mediat bëjnë me dije se një mjet është djegur dhe janë krijuar shtëllunga të mëdha tymi, duke paralizuar kështu dhe qarkullimin e automjeteve të tjera.
Sikurse mund të shihet edhe nga fotot, kjo ka bërë që të krijohet trafik, ku një varg i gjatë makinash presin nga krahu i tunelit që vjen për në Tiranë.
Njoftimi i Policisë:
Tiranë/Informacion paraprak
Me datë 04.05.2022, në tunelin Tiranë-Elbasan, ka marrë flakë në lëvizje e sipër dhe është djegur plotësisht, mjeti me drejtues shtetasin G. Q.
Si pasojë ka vetëm dëme materiale. Paraprakisht dyshohet se zjarri ka rënë si pasojë e një defekti në mjet. Grupi hetimor ndodhet në vendngjarje dhe po punon për përcaktimin e shkaqeve të rënies së zjarrit.
