Shefja e Spitalit Infektiv, Najada Çomo foli sot edhe për pasojat psikologjike që koronavirusi shkakton tek pacientët e prekur, duke marrë shkas nga rasti i 69-vjeçarit, i cili u vetëhodh nga kati i tretë i Spitalit Infektiv.
Në një intervistë televizive, Çomo tha se gjendja shëndetësore e 69-vjeçarit nga Bolena e Fierit paraqitet kritike jo vetëm për shkak të Covid-19, por tashmë edhe për shkak të pasojave pas ngjarjes së sotme.
“Sigurisht është ngjarje tragjike ajo që ka ndodhur me një pacient të shtruar në 24 orët e fundit. Ai ndodhet aktualisht në terapi intensive pranë Spitalit Infektiv. Akti është kryer nga në një situatë të rënduar psikologjike. 69-vjeçari është në situatë problematike qoftë nga sëmundja bazë, por edhe nga pasojat që u shkaktuan nga vetëhedhja. Puna jonë ka edhe këto lloj problematikash, por që gjithsesi puna jonë do të vazhdojë, ndërkohë që do të kërkoja edhe nga mediet të na mbështesin në punën tonë, të kemi suportin moral që nevojitet si në rastin e pacientëve, dhe në rastin e personelit mjekësor”, deklaroi Çomo.
“Për të qenë korrekt me ju, gjithmonë mbetet frika për pasojat që sëmundja lë në sistemin nervor. Padiskutim mund të themi që çdo pacient që është i prekur nga Covid është i rrezikuar nga çrregullimet psikologjike. Pranë Infektivit kemi psikologë të atashuar. Në krahun tim çdo ditë kam psikologun, është pjesë e punës në Spitalin Infektiv. Pacientët kur hyjnë në Infektiv kanë frikën e sëmundjes, kanë problematika të tjera, siç mund të jetë kontakti i pamundur me familjarët, gjë e cila rëndon psikologjikisht pacientin, edhe pse ne mbajmë kontakte të vazhdueshme me familjarët e çdo pacienti”, sqaroi doktoresha.
