Drejtori i Qendrës Kombëtare të Urgjencës Mjekësore, Skënder Brataj, theksoi sot se “nga të gjitha vatrat që janë në Shqipëri mbi 35% e tyre janë në Tiranë. Janë të shpërndara, nuk mund të thuash se kjo zonë është më e infektuar se tjetra”. Në një prononcim për mediet, Brataj tha se “Tirana do të bëhet zonë e kuqe. Pothuajse është një transmetim komunitar”.
“Infeksioni është shpërndarë në një masë shumë të madhe. Patjetër që masa do të ketë, sepse me këto përmasa që po merr sëmundshmëria, detyrimisht duhet që të kufizohen. Në qoftë se nuk kontrollohen duhet të rishikohen masat”, – nënvizoi Brataj.
Kreu i Urgjencës u shpreh se “nuk po respektohen masat antiCovid nga qytetarët”. “Hapja e shkollave ishte një thikë me dy presa dhe vazhdon të jetë. Lokalet në darkë dhe çfarëdolloj qofshin janë bërë një strehë për të mos përdorur maskën, të mosrespektimit as të distancës dhe as të kufizimit të infeksionit”, – tha Brataj.
