Detaje të tjera zbulohen mbi skandalin e tenderit korruptiv të Unazës së Re. “Boldnews.al” ka mësuar se Avdjol Dobi, 26-vjeçari shqiptar, përfaqësuesi ligjor i kompanisë “D-Haberman”, e regjistruar në shtetin Dalaware, ka një përvojë profesionale si recepsionist në Spitalin Amerikan në Tiranë.
Nga të dhënat e siguruara, ky djalosh, në emrin e të cilit është ngarkuar tenderi multi-milionësh, gjatë dy viteve të fundit ka shërbyer si pritës e përcjellës i klientëve të spitalit privat. Fillimisht, Dobi ka qenë recepsionist në Spitalin Amerikan 2. Më tej, ai transferohet si recepsionist në Spitalin Amerikan 3.
Pas kësaj përvoje profesionale, ai shfaqet si përfaqësues ligjor i kompanisë ‘DH-Albania”, degë e shoqërisë së huaj “D-Haberman”. Dega shqiptare e kësaj kompanie është regjistruar në QKR në Korrik 2018, vetëm pak javë para se të fitonte tenderin për ndërtimin e Lotit të Parë të Unazës së Re, e konkretisht pjesën nga Pallati me Shigjeta e deri tek rreth-rrotullimi, në mes të kësaj rruge. Tenderi është zhvilluar nga Autoriteti Rrugor Shqiptar dhe kompania “DH-Albania” do të arkëtojë plot 20 milion euro për ndërtimin e saj.
Ky tender shkaktoi reagimin e banorëve të Unazës së Re, të cilët kundërshtojnë vendimin e autoriteteve shtetërore për prishjen e banesave të tyre. Gjithashtu, tenderi u konsiderua korruptiv nga opozita, e cila ka publikuar një seri të gjatë shkeljesh proceduriale, të cilat nisin që nga hartimi i projektit, përllogaritja e kostove, e deri tek procedurat fiktive të prokurimit publik.
Emisioni “Të Paekspozuarit” i gazetarit Ylli Rakipi publikoi mbrëmjen e së Enjtes disa dokumenta, në bazë të të cilave vërtetohet se kompania mëmë “D-Haberman” ka depozituar dokumenta të fallsifikuara në tenderin për ndërtimin e Unazës së Re. Pas këtij skandali, “Boldnews.al” verifikoi të dhënat mbi përfaqësuesin ligjor të kësaj kompanie në Shqipëri, Avdjol Dobi.
Ky djalosh i ri, pa asnjë eksperiencë publike në menaxhimin financiar, rezulton të ketë një jetë normale, si të gjithë të moshës së tij. Sipas fotove në rrjetet sociale, Dobi duket se pëlqen dëfrimet rinore. Por, në asnjë vend nuk rezulton që ai të ketë aftësinë për të menaxhuar një super-biznes, i cili po provohet nga dita në ditë se fsheh pas tij mashtrime, fallsifikime dhe veprime korruptive.
