Policia e Shtetit ka dalë me një njoftim zyrtar lidhur me ngjarjen e rëndë të ndodhur sot në Ballsh, ku një 34-vjeçar vrau bashkëshorten e tij dhe motrën e saj.
Mësohet se autori kishte debatuar fillimisht me gruan pasi kjo e fundit i kishte sugjeruar të mos pinte alkool. E ndjera Gentiana Caushaj i kishte kërkuar bashkëshortit që të shkonte te prindërit.
Më tej mësohet se Gazmend Musta në fillim ka qëlluar të shoqen, por aty ka ndërhyre kunata, Merisa Caushaj, për të mbrojtur motrën por edhe e atë e ka sulmuar me thikë, duke i lënë të dyja të vdekura.
Në banesë në momentin e krimit mësohet se kanë qenë dhe dy fëmijët e mitur të çiftit.
Njoftimi i Policisë
Specialistët për Hetimin e Krimeve në Komisariatin e Policisë Mallakastër bënë arrestimin në flagrancë të shtetasit G.M, 34 vjeç.
Arrestimi i këtij shtetasi u bë pasi dyshohet se në gjendje të dehur, rreth orës 17.30 në banesën e tij në Ballsh, për motive të dobëta, ka vrarë me thikë bashkëshorten e tij, shtetasen G.C, 31 vjeçe si edhe motrën e bashkëshortes, shtetasen M.C, 18 vjeçe, të cilat kanë ndërruar jetë në vend. Grupi hetimor po punon për zbardhjen e plotë të kësaj ngjarje.
