Kompania kryesore e taksive në Paris ka pezulluar përdorimin e makinave “Tesla Model 3” pas një aksidenti vdekjeprurës që përfshiu një nga automjetet e saj gjatë fundjavës. Në një deklaratë zyrtare, firma e taksive G7 tha se do të pezullonte përdorimin e 37 makinave “Tesla Model 3”, derisa të përfundonte një hetim policor për aksidentin fatal të së shtunës.
Mediat franceze raportojnë se një shofer i kompanisë G7 po transportonte familjen në një restorant dhe nuk ishte në orar pune.
Papritur ai humbi kontrollin e makinës dhe përplasi një person që po ecte me biçikletë si dhe tre këmbësorë. Si pasojë e aksidentit një person ndërroi jetë dhe tre të tjerë u plagosën. Aksidenti ka shumë të ngjarë të ketë ndodhur për shkak të një problemi teknik dhe mosfunksionimit të sistemit të modelit hibrid të Elon Musk.
Një drejtues i kompanisë franceze të taksive tha se shoferi u përpoq të ndalonte makinën, por ajo ka marrë shpejtësi më shumë dhe për pasojë ka humbur kontrollin.Deri më tani nuk dihet nëse mjeti kishte aktivizuar sistemin që e vendos në automatik “Autopilot”, raporton gazeta franceze “Le Figaro”.