Dhuna me bazë gjinore vazhdon të jetë një sfidë për autoritet në vend. Rritja e rasteve të denoncimeve, është dëshmi se sa serioze është situata. Këtë e konfirmon edhe zëvendësdrejtori i Përgjithshëm i Policisë së Shtetit Sokol Bizhga në tryezën e përbashkët të diskutimeve kundër dhunës me bazë gjinore me përfaqësues të Organizatës për Siguri dhe Bashkëpunim në Evropë.
Po ashtu me zhvillimet teknologjike edhe shantazhimet apo rastet e bullizimit online janë shtuar. Bizhga thekson se tashmë është ngritur një strukturë e posaçme për hetimin e tyre. Nga ana tjetër, përfaqësuesit e OSBE-së shtuan se strukturat e Policisë së Shtetit në Shqipëri duhet të bëjnë më shumë trajnime se si t’i trajtojnë viktimat e dhunës.
Në përfundim palët shtuan se dhuna online është një fenomen, i cili po përhapet gjerësisht që targetojnë kryesisht të rinjtë që vihen në presion. Ata kërkuan autoriteteve të policisë marrjen seriozisht të këtyre situatave.Diskutimet u mbyllën edhe me një shfaqje teatrale të një grupi aktorësh nga Bosnja Hercegovina, që servirën një ngjarje posaçërisht për këtë fenomen.
