Krujë/ Zjarri shkrumbon magazinën me bazë ushqimore për bagëtitë, ngordhin disa lopë në Larushk
Një zjarr i përmasave të mëdha ka përfshirë pasditen e sotme një magazinë që përdorej për ruajtjen e bazës ushqimore për bagëtitë, në fshatin Larushk të Krujës, duke shkaktuar dëme të konsiderueshme materiale.
Flakët kanë përfshirë një sasi të madhe ushqimi për bagëtitë dhe janë përhapur deri pranë kasolles, ku kanë djegur edhe disa lopë që ndodheshin aty.
Pas marrjes së njoftimit, në vendngjarje kanë mbërritur shërbimet zjarrfikëse të Krujës, të cilat kanë ndërhyrë për shuarjen e flakëve. Megjithatë, zjarri ka shkrumbuar të gjithë bazën ushqimore, përfshirë jonxhën, si dhe disa krerë bagëti.
Kafshët dhe magazina ishin në pronësi të Deli dhe Osman Tufës.
Ndërkohë, ende nuk dihen shkaqet e rënies së zjarrit. Autoritetet pritet të përcaktojnë rrethanat dhe shkaqet e plota të ngjarjes.
