Nën kujdesin e Guvernatorit të Bankës së Shqipërisë, Gent Sejko, u zhvillua online ceremonia e shpalljes së çmimeve fituese të konkursit të hapur “Çmimi i Guvernatorit për Diplomën më të Mirë për vitin 2020”.
Ky konkurs organizohet çdo fundvit nga Banka e Shqipërisë dhe i dedikohet studentëve shqiptarë të diplomuar brenda dhe jashtë vendit, për punë kërkimore-shkencore në një nga çështjet e ekonomiksit monetar e ndërkombëtar, stabilitetit financiar, çështje të integrimit ekonomik të vendeve të Ballkanit, në Europë, politika monetare dhe politikat makroprudenciale të Bankës së Shqipërisë, politika fiskale dhe roli i tyre në ekonomi, sistemi bankar shqiptar, si dhe aspekte të ekonomisë në përgjithësi.
Me çmimin e parë u vlerësua, Megi Jaupi, studente në Universitetin e Zyrihut ETH, Zvicër, me temën “Generative Adversarial Networks for Multivariate Return Simulation and Robust Portfolio Optimization”, çmim i cili iu dorëzua nga Guvernatori i Bankës së Shqipërisë, Gent Sejko.
Me çmimin e dytë u vlerësua, Argi Hanku, student në Universitetin e Vjenës, Austri, me temën “Evaluating Loë Frequency Liquidity Proxies”, çmim i cili iu dorëzua nga Zëvendësguvernatorja e Parë e Bankës së Shqipërisë, Luljeta Minxhozi.
Kjo temë fokusohet dhe diskuton likuiditetin si një karakteristikë e rëndësishme e investimeve të letrave me vlerë. Fokusi i temës mbi karakteristikat e likuiditetit sjell në këtë konkurs një këndvështrim të ri që nuk është trajtuar në aplikimet e mëparshme për Çmimin e Guvernatorit për Temën më të Mirë.
Likuiditeti i investimeve është një aspekt shumë i rëndësishëm dhe merr një vëmendje të veçantë në fushën e operacioneve monetare nga këndvështrimi i mirë-administrimit të rezervës valutore. Likuiditeti i portofolit të investimeve është një element i rëndësishëm i sjelljes investuese veçanërisht gjatë dhe pas periudhave të krizave financiare e ekonomike, por që nuk ka marrë shumë vëmendje në studimet e paraqitura deri tani.
Me çmimin e tretë u vlerësua, Eda Meta, studente në Universitetin “Berlin School of Economics and Law”, Gjermani, me temën “Assessment of the impact of CoCo bonds on banks”, çmim i cili iu dorëzua nga Zëvendësguvernatorja e Dytë e Bankës së Shqipërisë, Natasha Ahmetaj.
