Një 28-vjeçar është arrestuar nga policia në Tiranë, pasi rezultonte i shpallur në kërkim, i akuzuar nga SPAK, për sigurim të kushteve dhe mjeteve materiale për të kryer vrasje në kuadër të grupit të strukturuar kriminal.
Policia bën me dije se në pranga ka rënë Elvis Ndreca, emri i të cilit doli në përgjimet e SKY ECC në dosjen “Revanshi” të SPAK.
“U finalizua operacionin policor i koduar “Wanted”, gjatë të cilit u lokalizua dhe u kap shtetasi: E. N., 28 vjeç, banues në Lezhë. Për këtë shtetas, Gjykata e Posaçme e Shkallës së Parë për Korrupsionin dhe Krimin e Organizuar Tiranë ka caktuar masa e sigurisë “Arrest në burg”, për veprat penale “Sigurimi i kushteve dhe mjeteve materiale për të kryer vrasje”, kryer në kuadër të grupit të strukturuar kriminal, “Pjesëmarrja në grup të strukturuar kriminal” dhe “Kryerja e veprave penale nga organizata kriminale dhe grupi i strukturuar kriminal.” Shtetasi E. N. iu dorëzua Drejtorisë Vendore të Policisë Lezhë, për veprime të mëtejshme procedurale”, sqaron policia.
28-vjeçari akuzohet për veprën penale të “Sigurimit të kushteve për të kryer vrasje” ndaj Durim Bamit. Mësohet se ai është kushëriri i deputetit të PS në Lezhë, Eduard Ndrecës.
