Rexhep Rraja, djali i deputetit socialist Rrahman Rraja do të dalë para gjykatës me akuzën e përndjekjes. Prokuroria e Krujës ka mbyllur hetimet dhe ka vendosur që të përballet me pretendimet e 25 vjeçarit që e mohon dhunën ndaj ish të dashurës së tij.
Dosja është dërguar në gjykatë pavarësisht pretendimeve të Xhisiela Malokut që është tërhequr nga padia dhe pretendon se ndaj saj nuk është ushtruar dhunë. Një nga provat e prokurorisë është përgjimi ambjental që iu bë Rexhepit dhe Xhisielës në komisariatin e Krujës, ku të dy bisedojnë për mbylljen e çështjes. Avokati i Rexhep Rrajës nga ana tjetër pretendon se pikërisht kjo bisedë tregon normalizimin e marrëdhënieve mes të dyve dhe për këtë arsye, klienti i tij duhet të shpallet i pafajshëm.
Në denoncimin që i mori oficeri Emiljano Nuhu, Xhisiela Maloku tregon dhunën që pësoi në një hotel të Krujës, si u kërcënua nga Rrajat për të mos bërë denoncim dhe refuzimet e policëve për ta regjistruar kallëzimin e saj.
