Naftëtarët e Ballshit krahas grevës së urisë të disa pjestarëve të tyre, kanë vendosur paralelisht të protestojnë ditën e sotmë përballë Bashkisë Mallakastër. Ata janë aktualisht duke marshuar drejt institucionit lokal duke u grumbulluar masivisht në dy drejtime. Nën thirrjet “Duam jetë me dinjitet”, naftëtarët vijojnë luftën për marrjen e pagave të tyre të prapambetura nga kompania e naftës, si dhe gjithashtu kërkojnë dhe rikthimin e tyre në punë me kontrata individuale. Gjatë marshimit që po ndodh në këto momente në drejtim të bashkisë, naftëtarëve po u bashkohen dhe qytetarë,si dhe pjestarë të bizneseve të tjera në qytet.
Kujtojmë se një pjesë e naftëtarëve ndodhen ditën e sotme në ditën e 15 të grevës së urisë, ku disa prej tyre për shkak të problemeve shëndetësore janë detyruar të dalin prej ngujimit në gjendje të rënduar të shëndetit fizik. Qeveria është shfaqur indiferente ndaj problemit të tyre duke e shpallur një problem të brendshëm të kompanisë. Nga ana tjetër naftëtarët kanë deklaruar se nuk do të reshtin së protestuari për të drejtat e tyre duke përshkallëzuar protestat e tyre.
