Piktori Arben Kristani ka sjellë këto ditë në Durrës 80 tablo punuar në teknika të ndryshme, duke hapur kështu ekspozitën e tretë brenda pak vitesh në qytetin bregdetar.
Tablotë me akuarele dallohen për thjeshtësinë e shprehjes, ndërsa në ato të punuara në vaj dhe në akrilik ndjehet shqetësimi i artistit për temat e mëdha.
Kjo është ekspozita e 10-të personale e autorit 50-vjeçar, i cili ka ekspozuar gjithashtu përkrah kolegëve vendas dhe të huaj në Indonezi, Itali, Sllovaki, Hong Kong dhe Vietnam.
“Kjo ekspozitë është një kërkim në teknika të ndryshme – tha autori Arben Kristani për ATSH-në, duke e konsideruar veten një udhëtar që rrugëtimin artistik në kërkim të parajsës artistike e dallon brenda këtij realiteti piktoresk.
Në veprat e Arben Kristanit paraqiten peizazhe të natyrës në diversitetin gjeografik dhe stinor, portrete, kompozime dhe natyra të qeta, si dhe një seri punimesh në allçi dhe gdhendje në dru.
Siç shprehet edhe vetë, gjatë procesit krijues artisti e ndjen veten edhe si një marrës i këngës labe, si një luftëtar arvanitas apo si lahutar që vargëzon eposin.
Ekspozita e hapur në galerinë e arteve pamore “Nikolet Vasia” ka tërhequr interesimin e artdashësve dhe kolegëve të piktorit Kristani. Ajo do të qëndrojë e hapur deri në fund të muajit janar./k.s/j.p/atsh
