Nëntë vjedhje të ndodhura gjatë kohëve të fundit në kryeqytet kanë për autorë të dyshuar 3 persona, dy nga të cilët të mitur.
Policia finalizoi dy aksionet, duke kapur dhe marrë nën akuzë të dyshuarit.
I pari u ndalua një 26-vjeçar, gjatë aksionit të koduar “Recidivisti”, për 5 nga vjedhjet e zbuluara në subjekte të ndryshme, të portofolave, aparateve celularë dhe shumave të parave.
“Në kuadër të operacionit policor të koduar “Recidivisti”, të finalizuar nga Komisariati i Policisë Nr. 1, në bashkëpunim me Komisariatin e Policisë Vlorë, u bë kapja dhe ndalimi i shtetasit E. R., 26 vjeç. Ky shtetas dyshohet si autori i 5 vjedhjeve në subjekte të ndryshme, të portofolave, aparateve celularë dhe shumave të parave”, tha policia e Tiranës sot.
Kurse në kuadër të operacionit policor të koduar “Duo”, të finalizuar nga Komisariati i Policisë Nr. 6, u bë ndalimi i dy të miturve të moshave 14 dhe 15 vjeç.
“Në bashkëpunim me njëri-tjetrin, dyshohen si autorë të 4 vjedhjeve, ku kanë vjedhur 1 motomjet në Astir, 2 dyqane ku kanë marrë sende të ndryshme dhe shuma parash, si dhe një send brenda një automjeti, në muajt gusht dhe shtator”, sqaroi policia.
Punohet për dokumentimin e vjedhjeve të tjera që mund të jenë kryer nga këta tre persona të ndaluar, kurse hetimet i kaluan prokurorisë.
