Kryeministri Edi Rama ka shkarkuar Avokaten e Shtetit, Alma Hicka. Mësohet se në vend të saj, kryeministri ka propozuar Artur Metanin. Alma Hicka u emërua si Avokate e Shtetit në vitin 2013. Kujtojmë që lajmin e ka bërë të ditur vetë kryeministri Rama nëpërmjet profilit të tij në rrjetet sociale.
“E diplomuar shkëlqyeshëm në Shkollën e Lartë të Magjistraturës pas vendit të parë në rezultatet e kursit përkatës dhe Master në të drejtën civile nga Universiteti i Tiranës, në mungesë të çdo lirie konkurence e vlerësimi për meritën, Alma Hicka ka vijuar karrierën si gjykatëse e shkallës së parë dhe inspektore në Këshillin e Lartë të Drejtësisë.
Sot ajo ka marrë pëlqimin e merituar për të drejtuar avokaturën e shtetit, si një tjetër grua në karrierë që merr përsipër barrën e një përgjegjësie të madhe në rrugën e rimëkëmbjes së institucioneve të vendit dhe posaçërisht, si kryembrojtëse e interesit të shtetit shqiptar në shumë fushëbeteja ligjore me individë e sidomos kompani të “mirëarmatosura” me ekipe juridike”, shkruante Rama.
Ish-Avokatja e Shtetit Alma Hicka, ka qenë mjaft e sulmuar nga opozita, pas përfshirjes së bashkëshortit të saj në çështjen e CEZ. Hicka kishte nënshkruar një marrëveshje duke i falur rreth 600 milionë euro CEZ, ndërsa bashkëshorti i saj ka përfaqësuar CEZ si avokat në disa gjyqe të zhvilluara në Tiranë, këtë çështje opozita e ka cilësuar shpeshherë si konflikt interesi.
