Një tjetër atentat me armë zjarri është shënuar sot në vend. Sipas informacioneve një person ende i paidentifikuar që udhëtonte me automjetin tip “Wolswagen” ka qëlluar me armë zjarri drejt automjetit tip “Audi” ku po udhëtonin dy efektivë policie, me inicialet A.B dhe N.M të cilët fatmirësisht nuk kanë pësuar dëmtime.
Makina “Audi” është në pronësi të A.Bedinaj i cili është punonjës së patrullës së Përgjithshme të policisë në Vlorë. Mësohet se dy efektivët kanë qenë jashtë shërbimit.
Në vendngjarje kanë mbërritur forca të shumta policie. Ndërkohë që atentati i ndodhur mbrëmjen e sotme e cënon edhe më shumë sigurinë në vend pasi tashmë në shënjestër janë edhe efektivë të policisë dhe jo vetëm persona me veprimtari kriminale.
Njoftimi i Plotë:
Vlorë/Informacion paraprak
Rreth orës 19:40, në lagjen “Partizani”, në rrethana ende të paqarta, dyshohet se nga një automjet tip “Volkswagen”, një shtetas ende i paidentifikuar, ka qëlluar me armë zjarri në drejtim të automjetit tip “Audi” me të cilin udhëtonin shtetasit A. B., me detyrë punonjës i Patrullës së Përgjithshme në Komisariatin e Policisë Vlorë dhe N. M., me detyrë punonjës i Policisë Kufitare Sarandë, të cilët nuk kanë pësuar dëmtime.
Në momentin e ngjarjes, punonjësit e Policë kanë qenë jashtë shërbimit, duke udhëtuar me automjet privat.
Grupi hetimor ndodhet në vendngjarje dhe po punon për zbardhjen e plotë të rrethanave të ngjarjes, identifikimin dhe kapjen e autorit.
