Policia e Tiranës ka dalë me një komunikatë në lidhje me të moshuarën e cila u gjet pa shenja jete mesditën e kësaj të hëne në banesën e saj në kryeqytet.
Viktima është shtetasja Rafije Abedini 73-vjeç, teksa ngjarja ka ndodhur rreth orës 13:30, në një banesë në rrugën “Sulejman Pitarka”.
E moshuara është gjetur pa shenja jete e shtrirë në një divan dysh, teksa ishte e nxirë në pjesën e djathtë të fytyrës, ku kishte dhe disa gërvishtje.
Por, sipas bluve të kryeqytetit, nga veprimet e para hetimore, të kryera në vendngjarje, rezulton se 73-vjeçarja është rrëzuar disa ditë më parë dhe nuk ka dëmtime ose shenja dhune.
Rafije Abedini rezulton se kohët e fundit kishte shfaqur probleme shëndetësore dhe vuante nga disa sëmundje të ndryshme.
Sipas dëshmisë së vajzës së saj, e moshuara vuante nga shumë sëmundje si Parkinson, anemi, shtyllën kurrizore të dëmtuar, si dhe kishte hequr edhe gjirin nga kanceri. Vajza ka dëshmuar se prej dy javësh e moshuara nuk lëvizte, teksa prej një jave ndodhte e vetme në banesë.
Policia e Tiranës bën me dije se paraprakisht dyshohet se vdekja ka ardhur nga shkaqe natyrale, por për të përcaktuar në mënyrë përfundimtare shkakun e vdekjes pritet ekspertiza e thelluar nga Instituti i Mjekësisë Ligjore.
