Deputeti Ilir Beqja ka propozuar sot në Kuvend që gjatë verës, 2 ose 3 javë, administrata të jetë pushim edhe të premten dhe të henën përveç të shtunës dhe të dielës. Ish-ministri i Shëndetësisë tha se ky propozim duhet marrë në konsideratë nga qeveria për të ndihmuar ekonominë dhe shmangur fluksin e lëvizjes.
“I kërkoj qeverisë nga sot deri në 14 shtator kur fillon shkolla janë 9 javë, të mund të marrë në konsideratë që në 2 ose 3 fundjava ta bëjë ditë pushim edhe një të premte dhe një të hënë, që njerëzit të kenë mundësi për më shumë alternativa, të mos mbivendosemi të gjithë në gusht dhe te shlodhemi edhe ndihmojmë ekonominë. Pra nëse mund të shpallim tre fundjava, njerëzit mund të programojnë punët dhe prenotimet” tha ai në foltoren e Kuvendit në seancën e sotme plenare.
