Akademiku i njohur Salvatore Bushati është ndarë nga jeta ditën e sotme në moshën 70-vjeçare.
Homazhet do të mbahen të shtunën në sallën e Akademisë së Shkencave të Shqipërisë, nga ora 14.00-15.30. Akademik Bushati u lind në Tiranë, në vitin 1949, në një familje me emër si ajo e Bushatllinjve të Shkodrës.
Salvatore Bushati, inxhinier gjeofizikan, profesor, akademik u diplomua inxhinier gjeofizikan në Fakultetin e Gjeologjisë dhe Minierave të Universitetit Politeknik të Tiranës (1970–1974). Punoi në Shërbimin Gjeologjik Shqiptar me detyrën inxhinier gjeofizikan.
Kreu një sërë kualifikimesh pasuniversitare në Shqipëri dhe jashtë saj si në Universitetin “Pierre Marie Curie” dhe pothuaj në të gjitha vendet e Europës e më gjerë. Ka një karrierë të pasur shkencore, profesionale dhe pedagogjike. Në fillimet e para të veprimtarisë së tij ai drejton grupin kërkimor shkencor në studimet eksperimentale mbi mundësitë e përdorimit të metodave gjeofizike në kërkimin e mineralit të kromit në Shqipëri, duke vendosur bazat metodike gjeofizike, teorike dhe praktike të përdorimit të gravimetrisë e magnetometrisë në kërkimin e kromit (1974–1980), studime këto, që u konkretizuan me projektime e zbulime të shumta të kromit në Shqipëri.
