Ministri i Bujqësisë dhe Zhvillimit Rural, Blendi Çuçi, u shpreh sot se, eksportet e perimeve dhe frutave të freskëta gjatë muajit mars u rritën me 20% krahasuar me vitin e kaluar dhe gjeografia e kësaj tregtie u shtri pothuajse në të gjitha vendet e Europës.
Gjatë një interviste televizive ministri tha se, “strategjia që kemi ndërmarrë për rritjen e prodhimit vendas dhe të eksporteve ka rezultuar një instrument efikas për trendin poziv që po ndjek bujqësia dhe situata e krijuar nga COVID nuk e lë pa prekur sektorin e bujqësisë”.
“Jemi në një treg të lirë dhe në kuadër të marrëveshjeve me vendet CEFTA koridoret e gjelbra nuk e kanë penguar zhvillimin e trendit të rritjes së shkëmbimeve tregtare në fushën e bujqësisë”, u shpreh Çuçi.
Ai tha situata e krijuar nga COVID ka dhënë ndikim tek produktet e peshkut.
“Këtu kemi patur një rënie sidomos gjatë ditëve të para të COVID, pasi peshkatarët kanë punuar me kapacitete të reduktuara por tani po shohim rritje të kërkesës nga Italia për produktet peshkore të frekëta nga Shqipëria, kështu që po fillon edhe kjo pjesë e të riaktivizohet pozitivisht”, – tha ministri Çuçi.
