Pas padisë për ngacmim seksual, aktorja shqiptare Eliza Dushku ka përfituar plot 9.5 milionë dollarë. Shpërblimi monetar vjen nga rrjeti televiziv amerikan CBS. Ajo akuzoi për ngacmime seksuale kolegun e saj në sheshxhirimin e serialit “Bull”. Rreth një vit më parë, aktorja e mirënjohur shokoi me deklaratën e saj, ku tha se roli i saj në këtë serial u përjashtua për shkak të ankesës së saj publike.
Dushku aktroi në tre episode të serialit, dhe iu tha se roli i saj do të kthehej në të përjavshëm. Ky premtim nuk u mbajt kur Dushku foli për komentet e papërshtatshme bërë nga protagonisti i serialit, Michael Weatherly. Ky i fundit bëri shaka me subjekt përdhunimin, dhe sugjeroi një treshe.
Në momentin që u ankua për këto ngacmime, roli i saj u hoq nga seriali. Dushku bisedoi me rrjetin televiziv përmes një ndërmjetësi. Ata ranë dakord për ta paguar ekuivalenten e pagës që do të kishte marrë, nëse do të kishte punuar në serial për katër sezone.
Rrjeti televiziv amerikan CBS konfirmoi pagesën, në një deklaratë për shtyp.
“Aludimet në akuzat e znj. Dushku vërtetojnë se, edhe pse po i përkushtohemi një kulture pune të sigurt, gjithëpërfshirëse dhe të respektueshme, kemi shumë punë për të bërë. Pagesa kundrejt këtyre akuzave reflekton pagën që znj. Dushku do të kishte marrë nëse do të kishte aktruar rregullisht në serial. Pagesa u vendos bashkarisht gjatë bisedave me ndërmjetës”.
Ndërsa aktori që bëri komentet e papërshtatshme, Michael Weatherly tha:
“Gjatë xhirimeve, bëra ca shaka dhe u talla me dialogun në skenar. Kur Eliza më tha që s’ndihej mirë me gjuhën që përdora dhe humorin tim, u tmerrova nga ideja se mund ta kisha ofenduar dhe kërkova menjëherë falje. Pasi reflektova më tej, kuptova që çfarë thashë s’ishte as për të qeshur dhe as e përshtatshme. Kërkoj falje dhe pendohem për dhimbjen që i shkaktova Elizës”.
