Emisioni i mëngjesit në Top Channel, televizion kombëtar i Shqipërisë, nisi sot me një moderator, Blendi Salaj, pas vendimit të televizionit për të larguar nga puna dy vajzat që e shoqëronin 5 ditë në javë në emisionin e mëngjesit “Wake Up”, dy moderatoret Enxhi Nasufi dhe Neada Muçaj.
Salaj e nisi dhe vijoi emisionin në shoqërinë e një banoreje të Big Brother, Heidi Baçi, që ka probeme me artikulimin e shqipes, sepse është rritur në Itali dhe që nuk e njeh formatin e emisionit. Ai tha se emisioni do të ridimensionohej dhe çdo ditë do të ketë dikë në studio për të mbushur vendin e lënë bosh nga dy moderatorët e larguara.
Largimi i dy moderatorëve erdhi pas konflikteve të vazhdueshme mes tyre që u bënë publike edhe në mediat. Dje, në mëngjesit e fundit në ekran, dy moderatoret, së bashku me Blendi Salajn, mohuan kategorikisht çdo konflikt.
Gjatë transmetimit, ato theksuan se lajmet e qarkulluara nuk kanë asnjë bazë reale dhe se asnjë incident nuk ka ndodhur mes tyre, qoftë verbal apo fizik.
“Nuk ka ndodhur kurrë”, u shprehën ato në mënyrë të prerë. Muçaj shtoi se këto zëra nuk i kanë pëlqyer aspak, duke theksuar se është e padobishme dhe e pavend të flitet për përplasje të sajuara që nuk ekzistojnë. Ajo u shpreh se ndihet mirë që publiku ka nisur ta kuptojë realitetin dhe të mos i besojë çdo lajmi të shpërndarë në portale.
Por mohimi nuk ndikoi te stafi drejtues që vendosi t’i largojë, në ditën e dytë të javës së saponisur.
