Policia e Shkodrës ka shpallur në kërkim Bajram Çekorjan, pasi ai dyshohet si autori i vrasjes së 19-vjeçarit Erjon Xhenje, i cili u ekzekutua mbrëmjen e 18 shtatorit ndërsa ishte duke pirë kafe në një lokal pranë Bulevardit “Bujar Bishaniku” pranë vendit të quajtur rruga e madhe.
Burime për Abc bëjnë me dije që lidhur me këtë ngjarje policia ka shpallur në kërkim edhe dy persona të tjerë.
Kujtojmë që dy javë para vrasjes së 19-vjeçarit Xhenje, u ekzekutua pranë shtëpisë së tij në lagjen Kiras, Ismet Çekorja, i cili është babai i Bajram Çekorjas.
Katër ditë para vrasjes Ismet Çekorja doli dhe foli para mediave duke marrë në mbrojtje djalin e tij, i cili akuzohej gjithashtu për atentatin ndaj Alban Bruçit, i cili arriti të shpëtojë.
