Ne nuk kemi në dorë humbjet, por mund të mësojmë si të jetojmë pa njerëzit që kemi humbur, të përmirësojmë komunikimin dhe të hapim zemrën. Dhuratat këtë bëjnë, janë fjalët që s’thuhen dot të gjitha, për t’iu gjendur dikujt pranë.
Bashkë me deputetët Edmond Leka dhe Vullnet Sina, zgjodhëm Rajonin e Policisë së Vlorës, për t’u takuar me familjarët e policëve që kanë humbur jetën. Liljana Breshani kishte menduar për dhuratat, për t’ju thënë që jemi këtu, për të punuar e ndihmuar sa mundemi, që datat simbol të gëzimit, të jenë për të gjithë.
Fëmijët janë shpresa, fëmijët janë festa, mjafton t’i shohësh për t’u bindur që 2021 do të jetë më i mirë. Me nxitjen e deputetit Damian Gjiknuri dhe një grupi miqsh, shkuam sot në Shtëpinë e Fëmijës prej nga, kohët e fundit, lajmet kanë qenë të lëkundura për shkak të gjendjes së Covid 19, por në fakt, ja ku janë të gjithë, me shëndet e përgjegjshmëri të plotë për rritjen e këtyre fëmijëve që iu gëzuan sot dhuratave.
Do doja ta shihja buzëqeshjen e tyre jo vetëm në ditë feste, prandaj i kërkoj kujtdo që mundet, bashkë me ne të gjithë, të ndihmojmë këta fëmijë gjatë gjithë vitit, për t’ju lehtësuar jetën që nuk kanë zgjedhur!
