Mediat britanike kanë kryqëzuar këngëtaren me origjinë shqiptare Rita Ora, për shkak se shkeli rregullat e kufizimit të përhapjes së Covid 19. Ylli i popit organizoi një darkë sekrete për ditëlindjen e saj të 30-të, me 30 të ftuar në një restorant në Londrën perëndimore të shtunën.
Një punonjës i spitalit ka pyetur: “A mendojnë se rregullat nuk zbatohen për ta pasi janë të pasur apo të famshëm?”
Qeveria britanike i ka ndaluar qytetarët që të jenë pjesë e organizimeve të përbashkëta, me shumë persona, ndërsa këngëtarja me origjinë shqiptare është konsideruar si mashtruese dhe egoiste.
Mes të ftuarve të Rita Orës ishin dhe yje të shoëbizit, si modelet Cara dhe Poppy Delevingne. Të ftuarit në festën e Ritës, u kapën duke dalë nga lokali, nga dera e pasme me shishe alkooli në dorë.
Një patrullë e Policisë u afrua pranë restorantit dhe panë nga dritarja, se çfarë po ndodhte brenda. Mësohet se Rita dhe motra e saj kanë qenë të parat që kanë mbërritur në restorant, dhe kanë pritur mbërritjen e të ftuave të tjerë. Mësohet se të gjithë të ftuarit kanë hyrë në lokal nga dera e pasme, dhe janë kujdesur që askush tjetër të mos prishte festën që ka vazhduar deri në orët e para të mëngjesit.
Rita u pa me taka të larta, një fustan të bardhë saten dhe një pallto ndërsa u shoqërua nga sigurimi teksa u largua nga lokali. Këngëtarja shqiptare mbante një maskë dhe një çantë të zezë, në momentin kur shihet duke hyrë në makinën e saj që e priste jashtë lokalit.
Një nënë 38-vjeçare që jeton afër vendit të ditëlindjes së Ritës tha: “Nuk kam ide se si dikush mund të ishte egoist sa të bënte diçka të tillë. Është e turpshme të organizosh një festë me shumë njerëz në një kohë pandemie”.
Qeveria britanike ka vendosur një bllokim kombëtar nga 5 nëntori deri më 2 dhjetor në një përpjekje për të parandaluar tubimet shoqërore dhe festat familjare.
Rregullat thonë se njerëzit duhet të qëndrojnë në shtëpi dhe të shmangin takimin me të tjerët me të cilët nuk jetojnë. Restorantet duhet të qëndrojnë të mbyllura, përveç vakteve të gatshme. Shkeljet mund të rezultojnë në gjoba të majme.
