Ditën e djeshme, 24 Korrik 2020, AOS (Albanian Ornithological Society) u informua nga banorët lokalë dhe njëkohësisht përkujdesësit e lejlekëve në zonën e Fierit për rënien e tre lejlekëve të vegjël nga foleja.
AOS organizoi menjëherë një aksion shpëtimi me një ekip të dedikuar që vizitoi folenë dhe kontrolloi gjendjen e të vegjëlve. Për fat të keq, dy nga lejlekët nuk i mbijetuan dot rënies, ndërsa individi i dytë ishte më me fat por ende shumë i dobët fizikisht.
Ekipi e transportoi menjëherë të voglin në Qendrën e Rehabilitimit të Shpendëve të Egër në Divjakë ku dhe u përkujdes për ta ushqyer. Për ecurinë e lejlekut të vogël do t’ju bëjmë me dije në një moment të dytë. Po kështu dhe për gjendjen e lejlekëve të tjerë të kësaj foleje që duket se po kalojnë një situatë kritike të cilën po e monitorojmë nga afër.
Faza e tanishme është kritike për lejlekët e vegjël me disa prej tyre që humbasin dhe jetën si pasojë e rënies nga fleja, mungesës së ushqimit dhe elektroshokut me linjat elektrike.
AOS falenderon nga zemra banorët e zonës që përkujdesen cdo ditë për lejlekët. Falemnderit Arben dhe Petraq për përkujdesjen dhe lajmërimin e menjëhershëm! Ju jemi shumë mirënjohës!
