Burg përjetë kërkoi Prokuroria e Fierit për Azgan Mërnicën, të riun i cili në maj të 2024-ës vrau me armë zjarri efektivin e Policisë së Shqiponjave, 29-vjeçarin Novruz Cenalia.
24-vjeçari është duke u gjykuar për akuzat e vrasjes së punonjësit të policisë, e cila parashikon edhe dënimin maksimal, armëmbajtje pa leje si edhe drejtim mjeti në mënyrë të parregullt.
Rrethanat për akuzën e fundit janë bërë edhe shkak për ngjarjen e rëndë të regjistruar mesditën e 13 majit të një viti më parë.
Sipas Prokurorisë së Fierit, që lexoi këtë të enjte pretencën, konflikti që çoi në përdorimin e armës nisi pasi polici i Shqiponjave ndaloi Mërnicën për t’i tërhequr vëmendjen pse ishte futur në kthesë me shpejtësi.
Ai ka ndaluar më pas mjetin e tij, i është afruar efektivit të policisë, i cili ishte i veshur me uniformën e punës dhe ishte i identifikueshëm si pjesë e strukturës së policisë, dhe e ka qëlluar në fytyrë duke e lënë të vdekur në vend.
Pas ngjarjes, autori u arratis dhe vetëm pas 3 ditësh kërkime, pas negociatave të policisë dhe familjarëve të tij, pranoi të vetëdorëzohej.
