Një tjetër aks i ri në shërbim të zhvillimit bujqësor e rural të rajonit të Korçës, do të jetë rruga bujqësore Lumalas – Melçan – Porodinë, e cila i është nënshtruar rikonstruksionit të plotë. Tejet e amortizuar dhe pa asnjë standard sigurie për lëvizjen e banorëve dhe mjeteve, rruga ishte kthyer në një pengesë serioze në transportin e produkteve bujqësore të fermerëve të zonës dhe qarkullimin e mjeteve. Bashkia Korçë, njofton se, tashmë është drejt përfundimit asfaltimi i unazës bujqësore, Lumalas – Melçan – Porodinë, një aks i rëndësishëm në infrastrukturën rrugore rurale.
Rikonstruksioni i plotë i 3 km rrugë në këtë aks të rëndësishëm, do të përmirësojë lëvizjet e transportit dhe aksesin në tokat bujqësore për banorët e këtyre fshatrave. Ky investim i paraprin degëzimit të parashikuar në një fazë të dytë punimesh, i cili do të lidhë këtë segment me Teqenë e Melçanit. Rruga lehtëson qarkullimin e produkteve bujqësore të zonës drejt qendrave te grumbullimit në Korçë, duke sjellë përfitime për fermerët të dalin më shpejt në treg, të fitojnë kohë dhe të ardhura ekonomike më të larta.
