Një ngjarje e rëndë ka tronditur qytetin e Beratit, ku një grua 30-vjeçare e identifikuar si Lavia Gjata, ka humbur jetën pas një aksidenti të rëndë.
Sipas korrespondentit të Euronews Albania aksidenti ndodhi në aksin rrugor “Berat-Dimal”, në zonën e Moravës ku makina e tipit “BMW” që po drejtohej nga një 25-vjeçar përplasi gruan me fëmijën e saj.
Gazetari thotë se makina po lëvizte me 60 km/orë kur ka përplasur 30-vjeçaren e cila kishte në krah fëmijën e saj 2-vjeçar ndërkohë këtë skenë të tmerrshme e ka parë dhe bashkëshorti i saj.
Sipas informacioneve paraprake, fatmirësisht fëmija ka shpëtuar dhe nuk ka asnjë rrezik shëndetësor për jetën e tij.
“Shtetasi A. Tafa., 25 vjeç, duke drejtuar automjetin e tij ka aksidentuar shtetasen Lavia Gjata, 30 vjeçe dhe fëmijën e saj 2 vjeç, (këmbësorë). Shtetasja Lavia Gjata, si pasojë e plagëve të marra ka ndërruar jetë, ndërsa fëmija i saj nuk ka probleme për jetën”, njofton policia.
“25-vjeçari A.Tafa. është shoqëruar për hetime, deri në sqarimin e plotë të rrethanave të aksidentit ndërsa grupi hetimor ndodhet në vendin e ngjarjes dhe vazhdon veprimet hetimore për zbardhjen e shkaqeve të aksidentit”, thuhet në njoftimin e Policisë së Beratit.
