Futbollisti më i vjetër në Angli, Dickie Borthwick, insiston se ai mund të luajë 90 minuta të plotë përkundër që muajin e ardhshëm do t’i mbushë 84 vjet. “Do ta jap më të mirën time. Jam i fortë si guri, s’kam frikë dhe e dua futbollin”.
Njeriu i njohur si futbollisti më i vjetër në Angli ende stërvitet çdo ditë në tentim për ta përmirësuar edhe më shumë teknikën dhe fuqinë e goditjes së tij, në rast se i vjen mundësia të luajë për ndonjë klub të ri.
“Më poshtë është një mur. Unë shpeshherë e stërvis goditjen time duke e goditur topin drejt murit dhe kjo më ndihmon që t’i mbajë këmbët në formë sa më të mirë”, ka thënë Borthwick në një intervistë për SportBible. “Çdo mëngjes unë dal te dera e shtëpisë dhe marr dhjetë herë frymë thellë. Unë gjithashtu e bëj këtë edhe në mbrëmje, para se të fle”.
Inxhinieri i pensionuar nga Weymoth e kishte filluar karrierën e tij si futbollist në pozitën e qendërsulmuesit, mirëpo më vonë kishte luajtur si sulmues i krahut të majtë. “Jam në dispozicion tani. Më mungon shumë të luaj futboll”, shtoi ai.
Ai për momentin është pa klub, pasi që ekipi i veteranëve për të cilët luante tashmë është mbyllur. Është edhe një tjetër ekip i veteranëve afër vendit ku ai jeton, mirëpo ai po e kërkon një sfidë të re. “Ata janë garues dhe kanë lojtarë që janë 35 dhe 40-vjeçarë. Nuk janë veteranë. Ne luanim futboll çdo dy javë. Kishim diçka të cilën mezi e prisnim. Por, ato ditë tanimë kanë marrë fund”, tha Borthwick.
Mate, what a legend… look at the boots and number! Dickie Borthwick! pic.twitter.com/RQEWm9RqZS
— 𝕭𝖔𝖇𝖇𝖞 𝕭𝖊𝖎𝖌𝖊 (@KoolAidKG) March 11, 2014
Borthwick, tifoz i Manchester Unitedit, i ka bërë më shumë sesa 1600 paraqitjet gjatë karrierës 72-vjeçare të tij, me Ross Countyn, Invergordon Town, Dorset e Portland Town. Për më tepër, Borthwick ishte njoftuar se është prekur nga kanceri, por ishte shëruar pas vetëm tetë javësh trajtim.
“Ata ma dhanë lajmin e keq, por ishte i trajtueshëm. Dashuria ime për futbollin më shtyu ta luftoj atë sëmundje dhe unë e mposhta shpejt”.
