Sipas CEO të BioNTech,  tre doza të vaksinës kundër Covid-19 nuk janë të mjaftueshme për të luftuar “Omicron”. Gjatë një deklarate për mediat Ugur Sahin tha se personat të cilët kanë marrë të treja dozat e vaksinës mund ta transmetojnë virusin.

“Ne duhet të jemi të vetëdijshëm se edhe personat që kanë marrë të tre dozat ka të ngjarë të transmetojnë virusin. Është e qartë se jemi larg efektivitetit prej 95 për qind kundër virusit fillestar”, tha ai. Sahin gjithashtu tha të dhënat e hershme nga Britania dhe Afrika e Jugut janë pozitive. Hulumtimi i fundit nga Afrika e Jugut, ku u raportua për herë të parë Omicron, sugjeroi se dy doza të vaksinës Pfizer/BioNTech janë 70 për qind efektive në reduktimin e rrezikut të shtrimit në spital.

“Për shkak të Omicron do të ketë një humbje të efektivitetit me kalimin e kohës. Dhe këto të parashikime nuk do të bazohen në të dhëna paraprake laboratorike, por në të dhëna të jetës reale, gjë që është më e përshtatshme,” tha imunologu gjerman.

Kompania gjermane tashmë është duke projektuar një vaksinë kundër koronavirusit për të luftuar variantin e ri, duke përdorur proteinën spike të Omicron dhe 32 mutacionet e tij si një antigjen. Sahin njoftoi se vaksina pritet të jetë gati në mars.