Gazetarja Klodiana Lala ka qenë ditën e djeshme deri në mesnatë në spitalin e Traumës në Tiranë, ku ishin lajmëruar për një vizitë të kryeministrit për të vizituar të lënduarit e tërmetit të djeshëm. Por, ngjarjet devijuan ndryshe.Në spital mbërrin i plagosur Mariglen Haka dhe pak më vonë halla e tij, e cila për shkak të plumbave të marrë, sipas gazetares, ka ndërruar jetë.
Ngjarja ndodhi dje sipas policisë në orën 23:30 në fshatin Zezë të Krujës. Transporti i tyre është kryer me makina luksoze, ndërsa, edhe për shkak të kësaj ngjarjeje, kryeministri Edi Rama ka anuluar vizitën.
Klodiana Lala e përshkruan situatën në spital me detaje: Ora 23:30 e së shtunës. Po prisja në derën e spitalit të Traumës ardhjen e kryeministrit per te vizituar të lënduarit nga tërmeti që goditi vendin. Papritmas në spital mbërrin një makinë luksoze. Me të ishte trasportuar një i plagosur. Mësova në pak minuta se ishte Mariglen Haka, i forti i Nikles. Një personazh problematik në botën e krimit për shkak të krimeve të rënda ku është përfshirë ndër vite. Djemtë që e shoqëronin ishin të irrituar. Bërtisnin, shanin, betoheshin për hakmarrje. Policia mezi po i mbante nën kontroll. Na informuan në këto momente se kryeministri e anuloi vizitën. Po prisja të mësoja diçka më shumë për atentatin ndaj Hakës në derën e shtëpisë se tij ne fshatin ZEZE, kur mbërriti e plagosur rëndë edhe halla e tij. Gruaja ndërroi jetë në pak minuta. Tmerr, nje grua e pafajshme vritet në atentat dhe pyetja është: sa do te vijojë e gjitha kjo? U largova nga Trauma duke u shkëmbyer me makinat e Forcave Speciale që morën në ruajtje Mareglen Haken. Ora shënonte 00.35 minuta!