Rreth 4000 sende të dyshuara si pasuri kulturore të luajtshme janë sekuestruar në një shtëpi në Tiranë. Në pranga ka rënë shtetasi Artan Koçiu pasi sendet e dyshuara si pasuri kulturore të paluajtshme janë gjetur në apartamentin e tij në rrugën “Shyqyri Brati”. 61-vjeçari Koçiu është emër i njohur për policinë pasi në vitin 2013 është arrestuar me akuzën e njëjtë të përvetësimit të veprave të trashëgimisë kulturore. Në dëshminë e tij, Koçiu ka deklaruar se është restaurues i veprave të artit. Më tej ai ka shtuar se veprat e artit nuk i ka vjedhur por është koleksionues i tyre dhe i ka blerë ato.
Njoftimi i policisë:
Finalizohet me sukses operacioni policor i koduar “Cultural Heritage”. Operacioni policor i zhvilluar nga Seksioni për Hetimin e Trafiqeve te Paligjshme në DVP Tiranë. Sekuestrohen rreth 4.000 sende të dyshuara si pasuri kulturore të luajtshme. Vihet në pranga poseduesi i tyre. Specialistët e Seksionit për Hetimin e Trafiqeve, në vijim të punës për goditjen e paligjshmërisë, pas një pune të mirëfilltë hetimore disajavore, organizuan dhe finalizuan me sukses operacionin policor të koduar “Cultural Heritage”, në kuadër të të cilit u bë arrestimi në flagrancë i shtetasit:
– A. K., 61 vjeç, banues në rrugën “Ali Demi”, për veprat penale “Vjedhja e veprave të artit e kulturës”, dhe “Trafikimi i veprave të artit dhe kulturës”.
Shërbimet e Policisë, gjatë kontrollit të ushtruar në një apartament në pronësi të këtij shtetasi, në rrugën “Shyqyri Brati”, kanë gjetur rreth 4.000 sende të dyshuara si pasuri kulturore të luajtshme. Në bashkëpunim me specialistët dhe ekspertët e Institucioneve të Specializuara në Ministrinë e Kulturës vijon puna për inventarizimin e këtyre objekteve dhe dokumentimin e plotë të kësaj veprimtarie kriminale. Materialet i kaluan Prokurorisë së Rrethit Gjyqësor Tiranë, për veprime të mëtejshme procedurale.
