Dy fëmijë shqiptarë të moshës 10 dhe 11 vjeç raportohet të kenë humbur dhe dyshohet të jenë r rëmbyer në Gjermani. Mediat spanjolle raportojnë se bëhet fjalë për të vegjëlit Kristian Toska dhe Amantia Toska. Nëna e fëmijëve ka denoncuar rastin në 17 janar të këtij viti, duke akuzuar babain e fëmijëve.
Policia gjermane, nisi një hetim mbi rastin pas denoncimit të nënës, dhe tani është vënë në kontakt me autoritetet spanjolle duke kërkuar bashkëpunimin e tyre. Një nga pistat e hetimit është që babai i dy fëmijëve të ketë udhëtuar qëllimisht nga Gjermania në Tenerife të Spanjës. Dyshohet se fëmijët fshihen pikërisht në ishullin e Tenerifes.
Familja, me origjinë shqiptare, jetonte në Gjermani dhe hetimet Policisë vendase tregojnë se babai dhe dy fëmijët e tij kanë kanë zbarkuar në Tenerife pa vënë dijeni nënën e të miturve.
Shoqata “SOSdesaparecidos” kërkon bashkëpunim të qytetarëve për të gjetur të dy fëmijët. 11-vjeçari Kristian Toska ka flokë ngjyrë gështenjë, sy kafe dhe mban syze optike. Ndërsa motra e tij Amantia Toska, është 10 vjeçe me flokë të gjatë, kaçurrelë dhe ngjyrë gështenjë.
