Zëvendës ministri i Transportit të Infrastrukturës Digjitale në Gjermani, Oliver Luksic do të vizitojë Tiranën më 11 dhe 12 prill, ku pritet të nënshkruajë marrëveshjen për njohjen reciproke të patentave.
Lajmin e ka bërë me dije Ambasada Gjermane në Tiranë, ku në njoftim u sqarua edhe se përmbajtja e marrëveshjes do të bëhet publike së shpejti.
Ambasada Gjermane:
“Z. Oliver Luksic, MdB, Sekretar Parlamentar i Shtetit (Zëvendësministër) në Ministrinë Federale të Transportit dhe Infrastrukturës Digjitale, do të vizitojë Tiranën në datat 11 dhe 12 Prill.
Krahas bisedave për temat e lëvizshmërisë së qëndrueshme dhe tranzicionit energjetik në sektorin e transportit, në qendër të vizitës së tij është edhe nënshkrimi i një marrëveshjeje për njohjen reciproke të lejeve të drejtimit së bashku me Ministren e Infrastrukturës dhe Energjisë, znj. Belinda Balluku.
Informacione të mëtejshme mbi përmbajtjen e marrëveshjes do publikohen së shpejti.”
Jo më larg se 1 muaj më parë kryeministri Edi Rama bëri me dije se çdo shqiptar do të ketë mundësi të lëvizë në Gjermani me patentën shqiptare. Kjo pasi shteti gjerman vendosi që të njohë lejen e drejtimit shqiptare.
