Në emisionin “Shqipëria Live” u diskutua sot vendimi i kancelares gjermane, Angela Merkel, për rivendosjen e karantinës totale duke nisur nga sot, 16 dhjetor. Në një lidhje “Skype” nga Gjermania ishte një biznesmen shqiptar, Ilir Blakçori, i cili ka një biznes familjar dhe se aktualisht e ka të mbyllur.
Ai u shpreh se ishte një vendim i drejtë dhe i rregullt, edhe pse biznesi i tij është i mbyllur. “Janë marrë masa shumë të forta për shkak të pandemisë. Për sa i përket biznesit tim, është mbyllur si gjithë bizneset e tjera. Nga ana e shtetit gjerman ne do të ndihmohemi në bazë të të ardhurave të viteve të fundit. Marrim një shumë për të mos falimentuar firmat.
Të gjithë punëtorët që janë të punësuar nëpër bizneset, do t’i kalojmë në një kohë pune të shkurtër dhe do i paguajmë, dhe lekët do i marrim nga qeveria. Kjo është me një përqindje sipas pagesave që paguaj punëtorët. Nëse unë paguaj një punëtor me 1500 euro në muaj, unë atë shumë duhet t’ia paguar punëtorit.
Pagesat sociale, sigurimet, mua më paguhen të gjitha mbrapsht nga qeveria. Unë u kam kaluar punëtorët në zyrën e punës dhe kjo e fundit dërgon lekët dhe unë i paguar punëtorët. Është shumë vendim i rregullt, e përshëndes si vendim, pasi po bëhet që të ndihmojnë të gjithë nga kjo pandemi”, tha Blaçkori.
