Damian Gjiknuri, përfaqësues i Partisë Socialiste në Këshillin Politik, ka debatuar me përfaqësuesit e Opozitës së Bashkuar pas prezantimit të letrës që PD e LSI, i kanë dërguar OSBE/ODIHR, ku kërkojnë ekspertizë për disa nga çështjet që kanë hasur në mosmarrëveshje mes palëve. Burime për Dosja.al bëjnë me dije se Gjiknuri iu ka kërkuar Oerd Bylykbashit dhe Petrit Vasilit të sjellin në KP propozime konkrete.
“Nuk mund të firmos letra të njëanshme. Letra juaj, vazhdim i retorikës politike. Nuk keni sjellë asnjë draft e propozim konkret. Nuk po sillni draft, nuk keni reflektuar. ODIHR i drejtohemi vetëm me produkt konkret. Pres propozimet tuaja konkrete për amendamentet.
Tek ODIHR, mosmarrëveshjet për draftet, jo mosmarrëveshjet teorike. Sipas 14 Janarit, ODIHR i kërkohet opinion për çështje të administrimit zgjedhor. Tek ODIHR kërkohet opinion për drafte konkrete”,-është shprehur Gjiknuri në KP.
Këshilli Politik sërish është në ngërç për hapjen e listave. Opozita kërkon një hapje 100% dhe mosprekje të koalicioneve, e po ashtu marrjen e ekspertizës nga OSBE/ODIHR. Por PS dorëzoi të premten një draft të ri me propozime, ku sugjerohet në pikën 1., hapja 100% e listave, por nga ana tjetër sanksionohet se është kreu i partisë ai që rendit emrat në listë, dhe se kandidatët që janë poshtë renditjes preferenciale të kryetarit duhet të mbledhin një numër votash, i cili është më i lartë se ai që i duhet partisë që të nxjerrë një mandat në një qark të caktuar, për të thyer renditjen e kryetarit. Kjo solli bojkotin e KP nga opozita të premten dhe mosdakordësinë për këtë çështje.
