Në bashkitë e qarkut të Gjirokastrës vijojnë operacionet humanitare për shpërndarjen e ndihmave, ku vetëm dje u ndihmuan me ushqime, barna mjekësore dhe të tjera rreth 110 familje. Prefekti i qarkut Gjirokastër, Astrit Aliaj, tha për ATSH-në se “vijon shpërndarja e ndihmave dhe ofrimin i asistencës për shtresat në nevojë në të gjitha bashkitë e qarkut ku konkretisht u ndihmuan me produkte ushqimore 75 familje, me produkte mjekësore 19 familje dhe me shërbime të tjera 15 familje”.
“Ndërsa Drejtoria Rajonale e Fondit Gjirokastër po vijon shpërndarjen e medikamenteve në 44 pacientë pensionistë mbi 65 vjeç, të cilët jetojnë vetëm në banesë si dhe shpërndarjen e medikamenteve të rimbursueshme në pacientë të sëmurë kronikë”, – theksoi Aliaj. Prefekti Aliaj u shpreh se “njësitë e qeverisjes vendore dhe degët territoriale kanë vazhduar punën e tyre në zbatim të detyrimeve ligjore dhe planit të veprimit të Prefektit të qarkut për situatën e krijuar nga pandemia e COVID-19”
