Kryeministri Edi Rama deklaro se sot janë kapur dy pika karburanti në Tiranë dhe Vlorë me faturime mbi çmimin e caktuar për të gjithë. Subjektet janë gjobitur me maksimumin ligjor.
Rama bën të ditur se subjektet janë gjobitur me maksimumin ligjor.
Kreu i Ekzekutivit thekson se “duke nisur nga java tjetër do të hyjë në fuqi sekuestrimi në vend i çdo pike karburanti që ngre qoftë edhe një qindarkë çmimin e shpallur paraprakisht nga Bordi i Administrimit”.
“Boll i ngre çmimet papushim kriza e shkaktuar nga lufta në Ukrainë, çdo ngritje për fitim në kurriz të popullit do të ndëshkohet siç e kërkon kjo gjendje lufte në tregjet ndërkombëtare”, shprehet Rama.
Bordi Kombëtar i Transparencës vendosi tre ditë më parë që çmimi i shitjes me pakicë i naftës për periudhën 16 deri më 21 mars do të jetë 203 lekë për litër.
Ky bord vendosi që çmimi me shumicë i nënproduktit gazoil do të jetë 199 lekë/litër, dhe nënproduktit benzinë të jetë 193 lekë/litër, çmimi i shitjes me pakicë të nënproduktit gasoil i standardit SSH EN 590 të jetë 203 lekë/litër ndërsa i nënproduktit benzinë e standardit SSH EN 228 të jetë 206 lekë/litër.
Gjithashtu u vendos që çmimi i shitjes me pakicë të nënproduktit gaz të jetë i pandryshueshëm, 93 lekë/litër.
Bordi i Transparencës njoftoi se do mblidhet përsëri ditën e hënë, datë 21.03.2022, me qëllim pasqyrimin në çmimin e shitjes me pakicë të këtyre nënprodukteve, të ndryshimeve të mundshme të çmimeve në tregjet ndërkombëtare.
Çdo operator i shitjes me shumicë dhe pakicë të nënprodukteve të naftës, është i detyruar të zbatojë vendimin e Bordit të Transparencës në lidhje me çmimet e shitjes me shumicë dhe pakicë.
“Në rast të shkeljeve të konstatuara nga operatorë të ndryshëm do të zbatohen penalitetet e përcaktuara në Aktin Normativ. Jemi në monitorim dhe kontroll të vazhdueshëm të situatës, për të garantuar zbatimin e plotë të vendimeve të Bordit të Transparencës”, ka theksuar Bordi i Transparencës i ngritur me qëllim kufizimin e përkohshëm të çmimeve të tregtimit me shumicë ose pakicë të nënprodukteve të naftës dhe gazit.
