Vala e dytë e Covid është kthyer tashmë në kryefjalë kudo në botë, teksa dhjetëra vende të globit po goditen sërish nga infektime të reja të koronavirusit. Një frike të tillë i ka dalë përpara guvernatori i rajonit të Toskanës në Itali.
Enrico Rossi i është referuar personave të infektuar në 24 orët e fundit, nga ku rezulton se për 16 raste të reja , 13 prej tyre ishin shtetash shqiptarë të sapoardhur nga Tirana. Kësisoj guvernatori Rossi është shprehur me tone të ashpra dhe ka kërkuar ndërhyrjen e qeverisë.
“Nga gjashtëmbëdhjetë raste të reja sot, katërmbëdhjetë të infektuar janë konfirmuar si qytetarë që kthehen nga jashtë. 31 të infektuar në javën e fundit, nga të cilat 27 erdhën nga Shqipëria. Qeveria gjithashtu duhet të ndërhyjë: në veçanti ministritë e brendshme dhe të shëndetësisë.
Nëse gjurmimi i pasagjerëve dhe mbikëqyrja aktive e tyre nuk është e mundur, ka vetëm një mundësi: bllokimin e fluturimeve direkte”, – është shprehur guvernatori. Ai thotë se duhet një përgjigje kombëtare për këtë çështje për fluturimet që vijnë edhe nga Bangladeshi, Kosova, Mali i Zi dhe Serbia. Rossi tha se ka kontaktuar menjëherë konsullatat e Perusë, Bangladeshit dhe Shqipërisë. Ai u ka kërkuar që udhëtarët që vijnë nga këto vende të karantinoren për 14 ditë pas hyrjes në Itali.
