Një tjetër viktimë është shënuar ditën e sotme nga Covid-19. Ai është Ylli Xhaferri, ish-mësues letërsie dhe ish-drejtor i gjimnazit të Rrogozhinës “Haxhi Qehaj”. Mësohet se ai ka humbur jetën pas infektimit nga koronavirusi, në spitalin Infektiv. Lajmi bëhet i ditur nga vetë stafi i kësaj shkolle, të cilët kanë përcjellë mesazhe ngushëllimi në rrjetet sociale.
Ylli Xhaferri, 66-vjeç ka lindur në Golem të Kavajës, ai kreu fakultetin Histori-Filologji dega Gjuhe-Letërsi. Ai punoi si mësues dhe për shumë vite drejtor në gjimnazin “Haxhi Qehaj”. Xhaferri ka botuar shume libra ku mund të veçojmë “Ikja e Muzave” si dhe “Mbrëmjen e merr gjumi vonë”
Ylli Xhaferri ka mbajtur edhe postin e Drejtorit të Drejtorisë Arsimore të qarkut Tiranë. “Ylli Xhaferri ishte për ne kolegu, intelektuali, drejtuesi, poeti, prozatori, qytetari dhe miku që me altruizmin e tij ishte i kudogjendur!
Ai ishte njeriu që karakterizohej nga pasioni për letërsinë, artin, arkitekturën dhe historikun e qytetit tonë! Një njeri me humor dhe pozitivitet, i gatshëm të ndihmonte çdo mësues të ri që të ndihej plot vetëbesim dhe pjesë e rëndësishme e institucionit.
Largimi i tij i parakohshëm ishte një humbje për miqtë dhe të njohurit! Të qoftë dheu i lehtë poet! Ngushëllimet më të sinqerta familjes, kolegëve dhe të afërmve të tij!”, shkruhet në mesazhi e përcjellë nga vetë shkolla.
