Një prej banorëve të Kombinatit të cilit i është shembur banesa ka deklaruar se nuk figuron fare në listën e Bashkisë së Tiranës për akomodim apo përfitim të bonusit të qirasë.
Në një prononcim për Ora News, banori thotë se është me katër fëmijë e se për të paguar qiranë është detyruar që të marrë një kredi.
“Emri im nuk figuron fare, banesa ka qenë në proces legalizimi. Kam marrë një shtëpi me qira, 250 mijë lekë, e paguaj vetë. Unë isha mirë në terezinë time, këta që e kanë prishur të më gjejnë zgjidhje.
Kam katër fëmijë. Këtu janë interesuar vetëm për zgjedhje. Kam marrë kredi për shtëpinë me qira, kërkojnë tre muaj paradhënie,”– tregon banori.
Nisja e shembjes së pallateve në Kombinat me argumentin se janë dëmtuar si pasojë e tërmetit të vitit 2019 ka krijuar përplasje.
Banorët kanë bërë rezistencë pasi shprehen se nuk do të braktisin shtëpitë e tyre deri në momentin që të kenë marrë një dokument zyrtar se në cilën banesë do të shpërngulen.
Gjykata Administrative e Tiranës ka dalë me një tjetër vendim që kundërshton prishjen e ndërtimeve në Kombinat, por pavarësisht kësaj shembjet kanë vijuar.
