Mbrëmjen e djeshme një makinë u dogj në mënyrë të qëllimshme në zonën e Krujës, brenda ambienteve të banesës së poseduesit. Makina tip ‘Golf’ është në pronësi të shtetasit G. D., 20 vjeç. Në një intervistë të dhënë për Faxnews, babai i 20-vjeçarit, Gani Demnushaj, tregon momentin si ndodhi ngjarja rreth orës 23:00 të mbrëmjes, teksa e gjithë familja ishte duke fjetur.
Makina sipas tij është djegur pasi mbi të është gjetur një bidon pa kapak, ku dyshohet të jetë mbajtur lënda djegëse nga agresori. Demnushaj thekson se ai dhe familjarët e tij nuk kanë konflikte me askënd dhe nuk ka informacion se përse mund të ketë ndodhur kjo ngjarje.
“Ishe me kalamajt brenda në shtëpi, sa kisha ra në gjumë. Ashtu nga ora 10 e gjysëm e natës ramë në gjumë, nga ora 11 e 3 minuta, veç kur ndodhi një shpërthim thashë se ra tërmet. Doli çuni, kur shikon makinën në flakë. Më pas erdhi policia dhe ka gjetur një bidon me një tapë të heqme sipër makinës. Flaka nuk shuhej as me ujë. Unë askujt nuk i kam borxh, as fëmijët e mi. Nuk kam asnjë lloj konflikti as në lagje as kurrkund. Tani drejtësia të bëj punën e saj. Shyqyr që më shpëtuan fëmijët dhe ndodhi kur s’kishte njeri në makinë”, tha Demnushaj.
